Îro pêncşem, Encûmena Ol û Baweriyan li bakur û rojhilatê Sûriyeyê li navenda çandî ya Hilala Zêrîn li bajarê Hesekê bi beşdariya Nûnerên Encûmena Ol û Baweriyan, Saziyên Rêveberiya Xweser ên Kantona Cezîrê û hejmarek partiyên siyasî, ligel komek rewşenbîr û akademîsyen û endamên Encûmena Ermeniyan û Encûmena Pîrmendan, Komcivînek gûftûgoyê bi sernavê “Vîzyona me ji bo projeya destûreke Sûriyê ku li gorî pir rengiya çandî, etnîkî û olî ya gelê Sûriyê be.” lidarxist.
Welîda Bûtî rêveberek li Encûmena Ol û Baweriyan, xwendineke berfireh a vîzyona siyasî û olî ji bo avakirina Sûriyeyeke pêşerojê pêşkêş kir, û tekezî li ser girîngiya ji nû ve avakirina dewleta Sûriyeyê li ser bingehên hevwelatîbûna wekhev, dad û lihevhatina civakî kir.
Xalên sereke yên vîzyona pêşniyarkirî:
1- Redkirina hemû şêweyên cudakariya olî, mezhebî û etnîkî û tekez li ser pêwîstiya bicihkirina prensîba wekheviyê di destûra bingehîn a Sûriyeyê ya pêşerojê de, misogerkirina azadiya baweriyê, û redkirina ferzkirina “oleke fermî ya dewletê”.
2- Tekez kirin ku Sûriye dewletek pir olî û pir etnîkî ye, û redkirina dabeşkirinên li ser bingeha “piraniyê” û “kêmahiyê”.
3- Şermezarkirina binpêkirinên li dijî pêkhateyên civaka Sûriyeyê, û redkirina bikaranîna ol wekî amûrek siyasî ku dibe sedema bêzanî û parçebûnê.
4- Tekezî li ser girîngiya perwerdehiya olî ya hevseng ku têgihîştin û nirxên jiyana hevbeş di navbera pêkhateyên cûda de pêş dixe.
5- Daxwaza parastina cihên pîroz ên hemû olan, û misogerkirina ku ew ji hêla peyrewên wan ve li gorî kevneşopiyê wan were birêvebirin.
6- Redkirina cudakariya li dijî jinan di bin her cure sedemek olî an çandî de, û misogerkirina beşdariya wan a bi bandor di hemû warên jiyanê de.
7- Daxwaza cezakirina pirpirsên sûcdarên li dijî Êzîdiyan, li gorî pîvanên navneteweyî yên mafên mirovan
Di dawiyê de, deriyê gûftûgoyan li pêşiya kesên amade hate vekirin, beşdaran bi yekdengî li ser girîngiya pêşxistina têgihîştinê û redkirina nefretê li hev kirin. Wan tekez kir ku vîzyona pêşniyarkirî bingehek xurt ji bo nivîsandina destûrek nû peyda dike ku pir rengiya Sûriyeyê nîşan dide û dewletek sivîl û demokratîk ava dike ku dad, wekhevî û jiyana hevbeş di navbera hemû pêkhateyan de nîşan dide.
