Bi coşeke kûr û bi dilekî tije êş û serbilindî, bajarê Hesekê birîndarên taxên Şêxmeqsûd û Eşrefiyê yên Helebê hembêz kirin. Ew birîndarên ku bûn nîşaneya berxwedanê li hember êrîşên hovane, îro li ser axa Hesekê hatin pêşwazîkirin.
Li ber Qada Panoramayê, bi hezaran dil bûn yek da ku nîşan bidin ku birîna Helebê, birîna Hesekê bixwe ye. Karwanê rûmetê yê ku ji Kantona Cizîrê bi rê ketibû, bi birîndaran re vegeriya û yekser ber bi Nexweşxaneya Şehîd Sariya ve çû, da ku birînên wan bi destên dilsoz werin dermankirin.
Wekî peyameke xurt a yekîtiya gelan û şermezarkirina koçberkirina bi darê zorê, bajarê Hesekê îro kete bin kincê şînê. Dikan hatin girtin û kolan bêdeng bûn, lê ev bêdengî qîrîna herî bilind bû li dijî zilma ku li ser gelê me hatî kirin. Hesekê îro ne tenê bajarek e, lê mertalek e ji bo birayên xwe.
