Duh Yekşemê, Encûmena Gelan a Kantona Cizîrê civîna xwe ya salane bi amadebûna Hevserokatiya Encûmena Gelên Demokratîk a Bakur û Rojhilatê Sûriyê û şandeyeke ji Rêveberiya Xweser a Kantona Cizîrê pêk anî.
Civîn piştî temamkirina karên rêxistinî, kontrolkirina endaman û xwendina protokola civîna borî dest pê kir. Di destpêkê de birêz Kenan Berekat axivî, wî spasiya vexwendinê kir û cejnên Mesîhî û Êzidiyan pîroz kir, her wiha tekez kir ku Encûmen rastiya dîrokî ya temsîlkirina gel bi hemû pêkhateyên xwe ve nîşan dide û hêviya serkeftinê ji bo xebatên Encûmenê xwest.
Piştre, şêwirmendê Rêveberiya Xweser nirxandineke siyasî li ser rewşa giştî û geşedanên siyasî yên li ser asta herêmê û Sûriyê pêşkêş kir. Di dû re, rapora rêxistinî ya salane hat xwendin ku tê de çalakiyên Encûmeê, guhertinên rêxistinî û statîstîka zagonên derçûyî yên di demê borî de hatibûn diyarkirin. Her wiha Hevserokatiyê rapora nirxandinê xwend, ku tê de stratejiyên Encûmenê û plan û bernameyên ji bo pêşerojê cih digirtin.
Di civînê de derî ji bo nîqaşên endaman hat vekirin, wan li ser rastiya rewşa rêxistinî, xalên erênî û neyînî axivîn û gelek pêşniyarên ku xizmeta Encûmenê di qonaxa bê de dikin, anîn ziman. Piştî ku Hevserokatiyê bersiva pirsên endaman da, encamnameyên civînê hatin xwendin, hatin dengdan û bi yekdengî hatin pejirandin.
Di dawiya civînê de, nameyên namzediyê yên ji bo endamtiyê hatin xwendin, Birêz Tariq Hemendî li ser navê Desteya Niştimanî ya Ereban û xanim Gulistan Hîbo li ser navê Partiya Kedkarên Kurdistanê hatibûn namzedkirin. Her du namzedî bi cuda hatin dengdan, piraniya dengan girtin û sonda yasayî xwarin. Bi vî rengî xebatên civîna salane bi dawî bûn.
