Rêveberiya Xweseriya Demokratîk a Herêma Bakur û Rojhilatê Sûriyê bi fikar û şermezarkirineke mezin daxuyaniya ku ji aliyê hêzên leşkerî yên hikûmeta demikî ya Sûriyê ve derketiye, dişopîne ku tê de gefên eşkere ji bo hedefgirtina taxên Şêxmeqsûd û Eşrefiyê yên bajarê Helebê dixwe û wan wekî “armancên leşkerî yên rewa” bi nav dike, di heman demê de daxwaza valakirina wan bi rêya korîdorên mirovî yên demkî dike.
Em teqez dikin dikin ku QSD`ê li taxên Şêxmeqsûd û Eşrefiyê tune ne û ev tax deverên niştecihbûnê yên bi sivîlan e ku piraniya şêniyên wan Kurd in, di nav de hejmareke mezin ji koçberên bi darê zorê ji Efrînê ku di salên dawî de zehmetî û koçberî kişandine. Ji ber vê yekê, çi êrîşên leşkerî, topbaran û hedefgirtina van taxan binpêkirineke berçav ji qanûna mirovî ya navneteweyî ye û berdewamiya siyasetên dijminatî li dijî gelê Sûriyê bi hemû pêkhateyên wê bêyî cûdahî ye.
Berdewamiya topbaran, êrîş û zêdebûna neqanûnî û bêserûber li ser taxên Şêxmeqsûd û Eşrefiyê, ligel êrîş û binpêkirinên ku li deverên berava Sûriyê, başûrê Sûriyê û deverên din ên Sûriyê tekez dike ku ev kiryar xizmeta aramiya welêt nakin lê belê dibin sedema bêaramiya welat, xirakirina ewlehiyê û gûrkirina pevçûnê û ev yek Sûriyê dûrî lihevkirina niştîmanî, çareseriya siyasî û yekîtiya niştîmanî ya xwestî, dixe.
Tevî pabendbûna bi şertên peymana 1`ê Nîsanê lê aliyê din bendên wê pêknanîn, siyaseta xwe ya dorpêçkirin û gurrkirinê de israr kiriye. Her wiha em tekez dikin ku tevî hewldanên me yên dubare ji bo pêwendiyê, vekirina rêyên diyalogê û beşdarbûna di nîqaşên cidî de, Wezareta Parastinê ya hikûmeta demikî ya Sûriyê berdewam e, diyalogê red dike û li ser zimanê gef û şer bi israr e.
Em bi eşkere radigihînin ku em li dijî her cureyên rageşiya leşkerî ne. Ji ber ku gel welat e û ew yê yekem û dawîn e ku di şer û pevçûnan de winda dike. Gelê Sûriyê ji ber salên dirêj ên wêranî û şeran gelek êş kişandiye, şer ji bilî êş, parçebûn û bêhêvîtiyê tiştek bi xwe re neaniye.
Ji ber vê yekê, em bang li berpirsên hikûmeta demikî ya Sûriyê dikin ku berpirsiyariyên xwe yên exlaqî û niştîmanî li hember bûyerên diqewimin bigre ser milê xwe, vegerin ser rêya aqil û mentiqê, diyalogê wekî yekane zimanê çareserkirina nakokiyan bikar bîne û derfetê nedin kesên ku destwerdanê dikin û ajandeyan ku tenê xizmeta dijminê gelê Sûriyê dike û dixwazin bi rêya hilweşandin û parçekirina Sûriyê armancên xwe, pêk bînin.
Her wiha em bang li gelê Sûriyê dikin nexasim ciwanên Sûriyê ku dûrî mentiqa şer û çekan bikevin, dengê rastiyê bilind bikin, tundiyê red bikin û nirxên jiyana hevbeş û biratiyê di navbera hemû pêkhateyên Sûriyê de biparêzin.
Di dawiyê de, Rêveberiya Xweseriya Demokratîk a Herêma Bakur û Rojhilatê Sûriyê piştgiriya xwe bi gelê me yê sivîl ê li taxên Şêxmeqsûd û Eşrefiyê û bi hemû zarokên gelê Sûriyê yên ku rastî binpêkirin û êrîşan tên re, radighîne û pabendbûna xwe bi vebijarka çareseriya siyasî ya demokratîk û avakirina Sûriyeke yekbûyî, demokratîk û nenavendî ku maf, rûmet û edaletê ji hemû zarokên xwe re bêyî cûdahî garantî dike, tekez dike.
