Şaredariya Gel a bajarê Hesekê, bi armanca parastina jîngehê û tenduristiya gel, li taxa Umran û baxçeyê Ugarîtê pêngaveke berfireh a paqijiyê li dar xist. Ev xebat di bin çavdêriya Ofîsa Rêveber û Beşa Paqijiyê ya şaredariyê de hat meşandin.
Di pêngavê de kolanên sereke û yên nav taxê hatin paqijkirin, gemarên komkirî hatin rakirin û li baxçeyê Ugarîtê jî xebatên sererastkirina qadên kesk hatin kirin.
Berpirsên Şaredariya Gel diyar kirin ku ev xebat beşek ji stratejiya giştî ya paqijiya bajêr e û teqez kirin ku ji bo jîngeheke saxlem, dê ev pêngav bi awayekî periyodîk berdewam bikin.
Ev çalakî wekî gaveke girîng a ji bo bilindkirina hişmendiya jîngehê tê dîtin. Berpirs hêvî dikin ku ev destpêşxerî di pêşerojê de hemû taxên bajêr lixwe bigire.
