Beşa Seweldariyê di Komîteya Çandinî û Seweldariyê li Kantona Cizîrê ragihand ku ji hefteya pêş de, dest bi belavkirina êm li ser xwediyên seweldariyê tê kirin. Ev biryar li gorî encamên serjimêriya nû ya sala 2025–2026’an hatiye girtin, bi armanca piştgirî û misogerkirina aramiya sektora seweldariyê û gihandina êm ji kesên mafdar re bi awayekî dadperwer.
Li gorî agahiyên komîteyên seweldariyê, karê serjimêriyê li seranserê kantonê bi rêya 32 komîteyên navendî berdewam dike û heya niha 80% ji karê wan bi dawî bûye. Di vê çarçoveyê de, mîqdara êm ya ji bo seweldariyê hatiye diyarkirin bi vî rengî hat guhertin: Ji bo her serî seweldariyên biçûk 18 kg (li şûna 10 kg), û ji bo her serî seweldariyê mezin 180 kg (li şûna 50 kg) hat diyarkirin.
Beşa Seweldariyê tekez kir ku pêvajoya dabeşkirinê wê li gorî rêzikên hatine destnîşankirin û li gorî daneyên serjimêriya nû bimeşe. Her wiha bang li xwediyên seweldariyê hat kirin ku bi komîteyên serjimêriyê re hevkar bin da ku ev pêvajo bi serkeftî bi dawî bibe, ji ber ku ev gav ji bo birêxistinkirina sektora malvaniyê, xurtkirina aboriya herêmî û dabînkirina ewlehiya xwarinê li Kantona Cizîrê xwedî girîngiyeke mezin e.
