Piştî salên dirêj ên nebûna berfê li herêmê, barîna wê di van her du rojên borî de li kantona Cizîrê wekî mizgîniyeke mezin ji bo sektora çandiniyê hat dîtin. Têkildarî vê mijarê, Hevserokê Beşa Hilberîna Şînatî li kantona Cizîrê, endazyar Mutez Ehmed diyar kir ku berf ne tenê av e, lê belê faktorekî xwezayî ye ku taybetmendiyên axê baştir dike.
Ehmed destnîşan kir ku sûda yekem a berfê şilkirina axê ye, ji ber ku berf hêdî bi hêdî dihele û av derbasî kûrahiya axê dibe, ev yek dibe sedema hilanîna şiliyê ji bo demeke dirêj û wekî çavkaniyek berdewam a avdanê tê hesibandin.
Her wiha Ehmed di nava axaftina xwe de bal kişand ser bandora berfê ya li ser baştirkirina pêkhateya axê, nemaze axên giran û tînî, ji ber ku pêvajoya cemidîn û helînê axê sist dike, hewakirina wê baştir dike û rê li ber belavbûna kokan vedike. Ji aliyekî din ve, berf wekî dermanekî xwezayî li dijî nexweşiyan kar dike, ji ber ku sermaya giran kurmên zirarder û bakteriyên di nav axê de ji nav dibe. Di heman demê de, berf pêkhateyên nîtrojenê ji hewayê digire û dema dihele wan wekî gubreyekî siruştî dide axê, ku ev yek xêr û berhema zeviyan zêde dike.
Li aliyê din, berf wekî qateke parastinê ji bo şînatiyên zivistanê tê dîtin, ji ber ku germahiya axê diparêze û nahêle qeşaya giran zirarê bide kokan, her wiha dibe alîkar ku xwêya zêde ji qatên jorîn ên axê were paqijkirin. Di dawiyê de, endazyar Mutez Ehmed hişyarî da ku helîna pir bilez dibe ku bibe sedema şûştina axê, lê tekez kir ku berf di asteke nerm de roleke sereke di amadekirina axê ji bo werza geşbûnê ya bê de dilîze.
