Encûmena Cîbcîkar a Rêveberiya Xweseriya Demokratîk a Kantona Cizîrê civîna xwe ya salane bi dawî kir, ku tê de rêze pêşniyarên girîng ji bo baştirkirina rewşa xizmetguzariyê, pêşxistina performansa rêveberî û saziyî û derbaskirina hemû astengiyên li pêş xebatê hatin girtin.
Ev civîn li bajarê Qamişlo bi beşdarbûna Hevserokatiya Encûmena Cîbcîkar, cîgirên wan, şêwirmend û hemû desteyên serokatiya desteyan, ofîs, rêveberî, encûmen û saziyên giştî yên kantonê hate lidarxistin.
Armanca sereke ya vê civînê ew bû ku nirxandineke kûr li ser hemû karên ku di dema borî de hatine encamdan were kirin, her wiha plan û bernameyên pêşerojê bi berfirehî werin nîqaşkirin. Di civînê de bi taybetî bal hate kişandin ser pirsgirêk û zehmetiyên ku di dema xebatê de rû dane û ji bo çareserkirina wan mekanîzmayên guncaw hatin pêşxistin, da ku ev yek bibe alîkar di pêşxistina karên rêveberî û xizmetguzariyê de li seranserî Kantona Cizîrê.
Civîn bi daxuyaniyeke ji aliyê Dîwanê ve dest pê kir, ku tê de hate destnîşankirin ku ev civîn ne tenê prosedureke rêveberî ya asayî ye, lê belê gaveke pêwîst û stratejîk e ji bo nirxandina tiştên ku hatine bidestxistin, çareserkirina kêmasiyan û danîna bingehek zelaltir û xurtir ji bo qonaxa bê. Piştî daxuyaniyê, rapora xebata salane ya Encûmenê hate xwendin. Di raporê de pêşkêşkirineke pir berfireh a hemî karên ku di nav salê de hatine kirin hebû û nirxandineke hûr li ser projeyên xizmetguzarî û pêşkeftinê yên ku di sektorên cuda de hatine temamkirin an jî hîn xebat li ser wan berdewam dike, hate kirin.
Raporê her wiha behsa planên pêşerojê yên bi armanca baştirkirina rastiya karên rêveberî û xizmetguzariyê kir, da ku bersivdayîna li pêdiviyên xelkê Kantona Cizîrê bi awayekî lezgîn û bi kalîte pêk were.
Civîna salane ya Encûmena Cîbcîkar her wiha bi pêşandana belgefîlmeke kurt berdewam kir ku tê de karên herî girîng û destkeftiyên di nava salê de hatine bidestxistin hatin nîşandan, bi taybetî hewildanên di warên xizmetguzarî, rêveberî û pêşkeftinê de hatin nirxandine.
Piştî pêşkêşkirina belgefîlmê, beşdaran li ser rewşa rêxistinî ya encûmenê, sazî û rêveberiyên wê nîqaşên berfireh kirin. Di van nîqaşan de mekanîzmaya xebatê hate şopandin, asta hevrêziya di navbera beşên rêveberî de hate nirxandin û bal hate kişandin ser performansa rêxistinî bi awayekî ku bandorkeriyê zêde bike û kalîteya xebatê baştir bike.
Di dawiya civînê de, derfeta axaftinê ji bo beşdaran hate vekirin û gelek nerîn û çavdêrî hatin pêşkêşkirin. Beşdaran li ser zehmetî û dijwariyên herî berbiçav ên ku rû bi rû mane sekinîn û pêşniyarên pratîkî yên bi armanca pêşxistina performansê, derbaskirina astengiyan û bilindkirina asta xizmetguzariyên ku pêşkêşî xelkê herêmê dibin, pêşkêş kirin.
