Saziya giştî ya Pembûyê li bakûr û rojhilatê Sûriya di 27ê heyva borî de xebata xwe bi wergirtina pembûyê ji cotkaran dest pê kir. Cotkarên Kantona Cezîrê jî li gorî belgeya çavkaniyê ku ji aliyê komîte û yekîneyên şêwirmendiyê ve hatiye dayîn berhemên xwe bo navendên wergirtinê yên girêdayî saziyan radest kirin.
Di destpêka Îlonê de li deverên cûda yên Kantona Cezîrê bi taybetî li Dirbêsiyê, Til Temir, Til Hemîs, Til Birak, Erîşê, Şedadê û Merkeda ku pembû yek ji berhemên stratejîk ên herî girîng ên herêmê ye, dest bi çinîna pembû kirin.
Di kargeha pembûyê ya Hesekê de, pêvajoya wergirtin û kirîna mîqdarên pembûyê bi rêbazek rêxistinî tê birêvebirin. Kar dest pê dike dema ku kamyonên barê pembûyê ji beşa giraniyê derbas dibin da ku barên xwe giran bikin. Piştî vê, ber bi qada teftîşê diçin ku li wir pisporan nimûneyan ji bo kontrola kalîteyê digirin. Piştî ku taybetmendiyên berhemê verast dibin, bar ji bo amadekirina pêvajoya gembûyê ber bi embaran tê veguhastin.
Encûmena Aborî û Çandiniyê ya Kantona Cezîrê buhayê kirîna tonek pembû ji cotkaran di vê demsalê de 600$ destnîşan kiriye, ev gavek e ku armanc dike ku piştgirî bide hilberînerên herêmî û çandiniyê li herêmê teşwîq bike.
Li gorî Gerenîndeya Berhemanîna Şînatiyan, rûbera ku îsal bi pembû hatiye çandin gihîştiye nêzîkî 70,000 donim, ku ev yek berfirehbûneke berbiçav di çandiniya vê berhema girîng de nîşan dide.
Ji bo ku pêvajoya wergirtinê bi awayek serketî were xebitandin, berî destpêkirina sezonê karmendên navendên wergirtinê li kursên taybet ên perwerdeyê beşdar bûn. Li wir, pispor û jimarparêz bi teknîkên nû yên kirînê hatin perwerdekirin da ku di sezona wergirtinê de hemû operasyon bi rêbaz û bêkêmasî were birêvebirin.
