Piştî giliyên hin komînên li bajarê Qamişlo yên li ser kêmbûna kalîteya hilberînê li nanpêjxaneyên li navçeya pîşesaziyê û 12 ê Adarê, komîteya nanpêjxaneyên encûmena aborî û çandiniyê ya Kantona Cezîrê bi armanca baştirkirina kalîteya nan kontrolên rojane yên nanpêjxaneyan zêde dike. Lê tevî çavdêriya berdewam ji aliyê komîteya nanpêjxaneyan û beşa şopandinê ve, kêmbûna kalîteya nan li van her du nanpêjxaneyan bû sedem ku komîte kirdariyên lezgîn bigire, di nav de çavdêriya ard, pêvajoyên hevîrkirinê, û qonaxên dawîn ên hilberîn û belavkirinê.
Kirdariyên şopandina meydanî ev bûn:
- Serdanên vekolînê yên rasterast: serdanek meydanî bo her du nanpêjxaneyan ji bo vekolîna herikîna kar.
- Têpîniyên teknîkî: tekezî li ser baştirkirina rêbazên veguhastina nan û pêşîgirtina li serhevkirina kultkan, û ji ajanên destûrdar tê xwestin ku di dema veguhastinê de qutiyên diyarkirî bikar bînin.
- Çavdêriya zincîra hilberînê: ji kalîteya ard û rêjeyên tevlihevkirinê bigire heya kontrolkirina germahiya firnê, heya pakkirin û veguhastinê.
Komîteyê tekez kir ku ev ger ne tenê bi çareserkirina kêmasiyên heyî ve sînordar in, lê belê armanc ew e ku planeke çavdêriya berdewam pêş bixin da ku aramiya kalîteyê ya demdirêj misoger bikin, di heman demê de çavdêriya rojane û dijwar berdewam bikin heta ku nanê bi kalîte bigihîje gel.
Ev kirdarî pabendbûna encûmena aborî û çandinîyê ya Kantona Cezîrê ji bo baştirkirina xizmetiyên bingehîn û parastina kalîteya nan wekî pêşîniyek sereke di planên çavdêrî nîşan didin.
