Rêveberiya Xweseriya Demokratîk a Kantona Cizîrê di çarçoveya meha Remezanê de bi dirûşma “Bi rihê biratiyê û avakirina Sûriyeke demokratîk, nenavendî, piralî” bi beşdariya berfireh a pêkhateyên olî û civakî, fitarek li dar xist.
Di şahiyê de saziyên olî, saziyên civakî, Senato û Konferansa Îslama Demokratîk, tevî nûnerên partiyên siyasî û şêxên eşîran ên ji pêkhateyên cuda yên Kurd, Ereb û Suryan beşdar bûn.
Merasîma fitarê bi axaftinên olî ji aliyê komek Olvanî ve dest pê kir û bi xêrhatina amadebûyan kirin û bal kişandin ser girîngiya meha Remezanê wekî meha hezkirin û biratiyê û derbaskirina cudahiyên olî û bîrdozî.
Wan amaje bi wê yekê kirin ku Rêveberiya Xweser kariye hemû ol û mezheban li ser yek maseyê kom bike û bang li her kesî kir ku nirxên hezkirin û biratiyê di navbera pêkhate û mezhebên cuda de bi pêş bixin.
Cîgirê Hevserokê Meclisa Rêveber a Rêveberiya Xweser a Kantona Cizîrê Mihemed El-Berak axaftinek kir û tê de bal kişand ser girîngiya vê cejnê ji ber şert û mercên dijwar ên ku Sûriye tê re derbas dibe. Wî diyar kir ku ev bûyer sembola yekitiya pêkhateyên cihêreng ên civaka Sûriyê ye, ji ber ku Misilman, Suryan, Êzidî, Ereb û Kurd di bin sîwanekê de kom dike. Di dawiya axaftina xwe de hêvî xwest ku aramî li seranserî Sûriyê pêk were.
Endamê Konferansa Îslama Demokratîk Mihemed Elî jî axivî û li vir çend ayetên Quranê yên ku li ser wateya hezkirin û efûkirin radiweste nirxand. Wî bal kişand ser vê yekê ku meha Remezanê meha îbadetê û nêzîkbûna xwe ji Xwedê re ye, hêvî kir ku Xwedê wê bi xêr û silametî ji her kesî re vegerîne.
Çalakî bi sirûdên olî bi dawî bû, ku atmosfereke giyanî ya taybet li êvarê zêde kir û bal kişand ser nirxên aheng û jiyana hevbeş a di navbera hemû beşên civakê de.
